మా దేశంలో అస్థిరతకు భారత్ కుట్ర: అజిత్‌ డోభాల్‌పై పాకిస్థాన్ ఆరోపణలు

భారత్ తమ దేశంలో అస్థిరతను సృష్టించేందుకు ఉగ్రవాదాన్ని ఒక విధానంగా ఉపయోగిస్తోందని పాకిస్థాన్ తీవ్ర ఆరోపణలు చేసింది. లండన్‌లోని ఇంటర్నేషనల్ ఇన్‌స్టిట్యూట్ ఫర్ స్ట్రాటజిక్ స్టడీస్ (ఐఐఎస్ఎస్)లో జరిగిన ఓ కార్యక్రమంలో పాకిస్థాన్ నేషనల్ కమాండ్ అథారిటీ సలహాదారు, రిటైర్డ్ లెఫ్టినెంట్ జనరల్ మజర్ జమిల్ ఈ సంచలన వ్యాఖ్యలు చేశారు. అక్టోబర్ 13న ఆయన చేసిన ప్రసంగానికి సంబంధించిన పూర్తి వివరాలు, రికార్డింగ్ తాజాగా బయటకు రావడంతో ఈ అంశం మరోసారి చర్చనీయాంశమైంది.

"దక్షిణాసియాలో అణు నిరోధకత, వ్యూహాత్మక స్థిరత్వం" అనే అంశంపై ప్రసంగించిన మజర్ జమిల్.. భారత జాతీయ భద్రతా సలహాదారు అజిత్ డోభాల్‌ను ప్రస్తావిస్తూ "డోభాల్ డాక్ట్రిన్"ను అమలు చేస్తూ పాకిస్థాన్‌ను బలహీనపరిచేందుకు భారత్ ప్రయత్నిస్తోందని ఆరోపించారు. తెహ్రీక్-ఏ-తాలిబన్ పాకిస్థాన్ (టీటీపీ), బలూచిస్థాన్ లిబరేషన్ ఆర్మీ (బీఎల్ఏ) వంటి ఉగ్రవాద సంస్థలకు భారత్ మద్దతిస్తోందని ఆయన ఆరోపణలు చేశారు. 1971 బంగ్లాదేశ్ యుద్ధ సమయంలో ముక్తి వాహినికి, 1980లలో ఎల్టీటీఈకి భారత్ మద్దతు ఇచ్చిందని, అలాగే 2001-2014 మధ్య ఆఫ్ఘనిస్థాన్-పాకిస్థాన్ సరిహద్దులో అనేక కాన్సులేట్లను నడిపిందని ఆయన చారిత్రక ఉదాహరణలను ప్రస్తావించారు.

భారత్ అణు విధానాన్ని కూడా జమిల్ తీవ్రంగా విమర్శించారు. భారత్ ప్రకటించిన 'నో ఫస్ట్ యూజ్' (మొదటగా అణ్వస్త్రాలను ప్రయోగించం) విధానం కేవలం ఒక దౌత్యపరమైన బూటకమని కొట్టిపారేశారు. గతేడాది 'ఆపరేషన్ సిందూర్' సమయంలో భారత్.. అణు, సంప్రదాయ వార్‌హెడ్‌లను మోసుకెళ్లగల బ్రహ్మోస్ క్షిపణులను ఉపయోగించిందని ఆరోపించారు. అయితే, బ్రహ్మోస్ కేవలం సంప్రదాయ వార్‌హెడ్‌లను మాత్రమే మోసుకెళ్లగలదని, అది వ్యూహాత్మక బలగాల పరిధిలోకి రాదని భారత వర్గాలు గతంలోనే స్పష్టం చేశాయి.

భారత్‌కు న్యూక్లియర్ సప్లయర్స్ గ్రూప్ (ఎన్ఎస్‌జీ) మినహాయింపును అంతర్జాతీయ సమాజం సమీక్షించాలని జమిల్ డిమాండ్ చేశారు. పురాణాలను జాతీయ శక్తితో ముడిపెట్టే ప్రమాదకరమైన భావజాలం భారత సైనిక ఆలోచనా విధానంలో ఉందని, ఇది ఈ ప్రాంత భద్రతకు పెను ముప్పుగా పరిణమించిందని ఆయన వ్యాఖ్యానించారు.

ఇరు దేశాల మధ్య కొంతకాలంగా ఉగ్రవాదం, అణు విధానాలపై ఆరోపణలు, ప్రత్యారోపణలు కొనసాగుతున్న విషయం తెలిసిందే. ఆఫ్ఘన్ గడ్డపై నుంచి తమపై దాడులు చేస్తున్న ఉగ్రవాదులకు భారత్ మద్దతిస్తోందని పాక్ ఆరోపిస్తుండగా.. తమ దేశంలో దాడులకు పాల్పడుతున్న ఉగ్రవాదులకు పాకిస్థాన్ ఆశ్రయం కల్పిస్తోందని భారత్ బలంగా వాదిస్తోంది. ఈ నేపథ్యంలో పాకిస్థాన్ వ్యూహాత్మక ప్రణాళికల విభాగానికి మాజీ అధిపతి అయిన జమిల్ చేసిన ఈ వ్యాఖ్యలు ప్రాధాన్యత సంతరించుకున్నాయి.